ياصياد السمج صدلي بنيه
واريدنه نقيه وميه بالميه
وماريدا سمج من نهر دجله تجيب
نهر دجله انترس شبان شيعيه
وكل جثة بنيه وشاب ياصياد
اذا موملك صالح يعني حوريه
وياصياد انصحك انته والوياك
نصيحه بكل اذان تحطه ترجيه
لازم بالبلم مايمشي كل صياد
لان يسحك الروس برجل مرديه
وتدري انته الجثث مفصوله عن الروس
وخاف يروح راس الغير راعيه
يصياد السمج تذكر كبل بالصيد
من تصيد وانته تغني باغنيه
بعد اذن النهر ماتطرب عله الصوت
هسه عله النهر كوم اقره لطميه
يصياد السمج هذا السمج مغشوش
شارب دم هلي وماشارب اميّه
يصياد التصيده ينكس النه الروس
ولو مرات صيدك اهون شويه
بس بالك بنات اهواي جوّه الماي
بلايه اهدوم ذبوه الوهابيه
وياصياد احذرك من تريد تصيد
خاف تصيد سمجه وتطلع بنيه
ويصياد الجثث صيد النه جثت شاب
عمره 18 واحلامه ورديــــــــــــــــه
طالبته المدارس والمدير يكول
النتايج طلعت ومقبول كليه
ويصياد وطلب من عندك يطلبون
واذا انته شريف بساع نفذه الهم
بدل ماتذب سليه وتريد تصيد
كوم اكسب ثواب وجفن ذب الهم
يصياد الجثث طوفت فوك الماي
ياصياد امانه عليك ركبهم
واكتب عالبلم مأجوره يابغداد
وابد والله ولدج ننسه عملتهم
بعد ماتنسمع منصوره يابغداد
بس مدهوره نسمع من مصايبهم
يصياد الفتن من جوه راس الماي
وصيّه النهر دجله تكله صالحهم
بغداد الكرخ واهل الرصافه اخوان
بس الذنب ذنبه اشلون يفصلهم
مع تحياتي ابــــــــ القائم ـــــــــن
موضوع: صياد السمج 
الثلاثاء أبريل 24, 2007 5:13 pm
